| ENGLISH |
 |
 |
საქართველოს საერთო სასამართლოების მოსამართლეებთან, 29 დეკემბერს, სამუშაო შეხვედრა გამართა საქპატენტის თავმჯდომარემ სოსო გიორგაძემ. საქპატენტის სათავო ოფისში გამართულ შეხვედრას ესწრებოდნენ: სააპელაციო სასამართლოს მოსამართლეები, იუსტიციის უმაღლესი საბჭოს, იუსტიციის უმაღლესი სკოლისა და სააპელაციო სასამართლოს თავმჯდომარის ბიუროს წარმომადგენლები. შეხვედრაში მონაწილეობა მიიღო საქართველოში ევროკავშირის დელეგაციის წარმომადგენლობის პროგრამების მენეჯერმა ქეთევან ხუციშვილმა. შეხვედრაზე განიხილეს ინტელექტუალური საკუთრების კანონმდებლობაში დაგეგმილი ცვლილებების პროექტები, რომლებიც ეხება ინტელექტუალური საკუთრების უფლებების აღსრულებასთან დაკავშირებულ საკითხებს. კანონპროექტები შემუშავდა ევროკავშირისა და საქართველოს ინტელექტუალური საკუთრების შესახებ პროექტის (EUGIPP) ფარგლებში. მოსამართლეებმა საკუთარი მოსაზრებები გამოთქვეს დაგეგმილ ცვლილებებთან დაკავშირებით და შეხვედრის მონაწილეებს გააცნეს ინტელექტუალური საკუთრების შესახებ საქმეების განხილვის სტატისტიკური მონაცემები.
საქართველოს ინტელექტუალური საკუთრების ეროვნული ცენტრის „ საქპატენტი“ გადაწყვეტილებით, მიმდინარე წელს, სტუ-მ ექვს გამოგონებასა და ერთ სასარგებლო მოდელზე მოიპოვა პატენტი. სტუ-ს გამოგონებები ეხება ბუნებრივი აირის გაჟონვის მართვისა და დეტექტორის მოწყობილობის, შშმ პირთა ეტლის კიბეზე გადასაადგილებელი სატრანსპორტო საშუალებისა და სისტემის, ასევე, ვენახების სეტყვისგან დამცავი მოწყობილობის და კალაპოტქვეშა წყალმიმღები ნაგებობის მოწყობას. სტუ გახდა პატენტის მფლობელი ერთ სასარგებლო მოდელზეც, რომელიც ეხება ცემენტ-ბეტონის შემვსების და შემავსებლის მიღების ხერხს. უნივერსიტეტს, როგორც პატენტის მფლობელს, განსაკუთრებული უფლება მიენიჭა გამოგონების პატენტით დაცვის პერიოდის განმავლობაში, მისი კომერციული მიზნით დამზადების, გაყიდვის, გავრცელების, იმპორტისა და სხვა ფორმით გამოყენებისათვის. უფლების დამადასტურებელი მოწმობები საქპატენტის თავმჯდომარემ სოსო გიორგაძემ პირადად გადასცა უნივერსიტეტის რექტორს დავით გურგენიძესა და გამომგონებლებს. პატენტის მოწმობები განთავსდა სტუ-ს ინტელექტუალური საკუთრების სამართლის ლაბორატორიაში, რომელიც უკვე 1 წელია ფუნქციონირებს.
საქპატენტის თავმჯდომარის მოადგილემ მანანა ფრუიძემ მონაწილეობა მიიღო საქართველოსა და ევროკავშირს შორის ვაჭრობის საკითხებზე ასოცირების კომიტეტის მე-9 შეხვედრაში, რომელიც ბელგიის სამეფოს დედაქალაქში 13 და 14 დეკემბერს გაიმართა. კომიტეტის დღის წესრიგის ერთ-ერთი საკითხი შეეხებოდა ინტელექტუალური საკუთრების სფეროში ევროკავშირთან ღრმა და ყოვლისმომცველი თავისუფალი სავაჭრო სივრცის შესახებ შეთანხმების (DCFTA) განხორციელების პროგრესს.
განსაკუთრებული
ქართული პროდუქტებისთვის, გეოგრაფიული აღნიშვნისა და
ადგილწარმოშობის დასახელების სტატუსის მინიჭებას საქართველოში საქპატენტი
ახორციელებს. გეოგრაფიული აღნიშვნა და ადგილწარმოშობის დასახელება მომხმარებელს
აწვდის ინფორმაციას, პროდუქტის წარმომავლობასა და იმ უნიკალურ მახასიათებლებზე,
რაც დაკავშირებულია წარმოშობის ადგილთან, რომლის დამახასიათებელი გარემო პირობები
და ადგილობრივ მოსახლეობაში არსებული წარმოების ტრადიციული ცოდნა ხდის თითოეულ
ასეთ პროდუქტს გამორჩეულს.
გაეროს სპეციალიზებული უწყების – ინტელექტუალური საკუთრების მსოფლიო ორგანიზაციისა (WIPO) და საქპატენტის ერთობლივი პროექტის ფარგლებში, ინტელექტუალური საკუთრების ზოგადი კურსი წარმატებით დაასრულა 68 მონაწილემ. ფინალურ გამოცდაზე საუკეთესო შედეგების მქონე სტუდენტებს, კურსის გავლის დამადასტურებელ საერთაშორისო სერტიფიკატებთან ერთად, საჩუქრები და სპეციალური ჯილდოები საქპატენტის თავმჯდომარემ სოსო გიორგაძემ და საზეიმო ღონისძიებაზე მყოფმა გაეროს მუდმივმა წარმომადგენელმა საქართველოში საბინე მახლმა გადასცეს.
უფროსკლასელებში ინოვაციებისა და ახალი
ტექნოლოგიების შექმნის წახალისების მიზნით,
წელს მერვედ ჩატარდა „ათასწლეულის ინოვაციის კონკურსი“. აშშ-ს საელჩოს ფინანსური
მხარდაჭერით და საქართველოს განათლებისა და მეცნიერების სამინისტროსთან თანამშრომლობით,
კონკურსს ყოველწლიურად ორგანიზებას უკეთებს ათასწლეულის ფონდი. კონკურსის მუდმივი და
აქტიური მხარდამჭერია საქპატენტი, რომელიც ყოველ წელს აჯილდოებს ფინალისტ გუნდებს და
უკვე მეორე წელია, მონაწილეობს საკონკურსო პროექტების შეფასებასა და გამარჯვებული გუნდების
შერჩევაში.
გეოგრაფიულ აღნიშვნა, რომელიც მიუთითებს ადგილზე, რომელიც იქ წარმოშობილი პროდუქტის დამახასიათებელ თვისებებს განაპირობებს, გლობალიზაციის პირობებში განსაკუთრებულ დაცვას საჭიროებს. ამ თემაზე გამოცდილებისა და ცოდნის გაზიარების მიზნით, თურქეთის რესპუბლიკის ქალაქ ანტალიაში სიმპოზიუმი გაიმართა, რომელშიც მონაწილეობა სხვადასხვა ქვეყნის ინტელექტუალური საკუთრების უწყების წარმომადგენელმა მიიღო.
რეგიონული შეხვედრის ორგანიზატორი იყო ინტელექტუალური საკუთრების მსოფლიო ორგანიზაცია (WIPO), თურქეთის პატენტებისა და სასაქონლო ნიშნების უწყებასთან „თურქპატენტან“, საქართველოს ინტელექტუალური საკუთრების ეროვნულ ცენტრთან „საქპატენტის“ და აზერბაიჯანის ინტელექტუალური საკუთრების უწყებასთან თანამშრომლობით. სიმპოზიუმზე, რომელიც 2022 წლის 24 და 25 ნოემბერს გაიმართა, საქპატენტს წარმოადგენდნენ თავმჯდომარის მოადგილე ნინო ჩიქოვანი და გამოგონებისა და ახალი ჯიშების დეპარტამენტის უფროსი მერაბ კუცია.
გიორგი
მერაბიშვილი ქართველი თაფლის მწარმოებელია, რომელიც იყენებს ცოდნას ინტელექტუალური საკუთრების სფეროში, რათა დაეხმაროს თაფლის მწარმოებლების კოოპერატივს მათ მიერ წარმოებული
ნინოწმინდის თაფლის ადგილობრივ ბაზარზე გატანასა და პოპულარიზაციაში გეოგრაფიული აღნიშვნის გამოყენების
მეშვეობით.
საქართველოში გეოგრაფიული აღნიშვნებისა და ადგილწარმოშობის
დასახელებების რეგისტრაცია საქპატენტის უფლებამოსილებას წარმოადგენს. ეს სტატუსები
ენიჭება განსაკუთრებულ ქართულ პროდუქტებს.
გეოგრაფიული აღნიშვნა და ადგილწარმოშობის დასახელება მომხმარებელს
აწვდის ინფორმაციას, პროდუქტის წარმომავლობასა და იმ უნიკალურ მახასიათებლებზე,
რაც დაკავშირებულია
წარმოშობის ადგილთან, რომლის
დამახასიათებელი
გარემო პირობები და ადგილობრივ
მოსახლეობაში არსებული წარმოების ტრადიციული ცოდნა, ხდის თითოეულ ასეთ პროდუქტს გამორჩეულს.
ინტერნეტ სივრცეში არსებულ გამოწვევებზე მსჯელობის მიზნით, ყოველწლიურ ფორუმზე „საქართველოს ინტერნეტ-მმართველობა“, შეიკრიბნენ საჯარო, კერძო და არასამთავრობო სექტორის წარმომადგენლები. საჯარო კონსულტაციებისა და დიალოგის ფორმატში მიმდინარე ღონისძიების ორგანიზატორია საქართველოს მცირე და საშუალო სატელეკომუნიკაციო ოპერატორების ასოციაცია (TOA). დღის წესრიგით გათვალისწინებული იყო ინტერნეტ სივრცეში საავტორო უფლებების დაცვის თემა. დისკუსიაში მონაწილეობის მისაღებად მიწვეული იყო საქპატენტის თავმჯდომარის მოადგილე მანანა ფრუიძე. ფორუმი ოთხი დღის განმავლობაში ტექნოპარკში მიმდინარეობდა. მას მასპინძლობდა საქართველოს ეკონომიკისა და მდგრადი განვითარების სამინისტრო, კომუნიკაციების ეროვნული კომისია და საქართველოს ინტერნეტ საზოგადოება (ISOC-Georgia).
